RSS Feed

      

سێ‌شه‌ممه، ۲۲‌ی ئاگوستی ۲۰۱۷

Renaissance News Index

 

هیچ کۆمه‌ڵگه‌یه‌ک له‌سه‌ر بنه‌مای نکۆڵیکردن له‌ ئازادیی تاک بنیات نانرێ
« مه‌هاتما گاندی »
 

  ڕوانگه‌و بیروڕا »» سیاسی           ئه‌م لینکه [2172] جار بینراوه       Send this page to your friens    Print this page    Send comment to this page

 

ئێران، شه‌ڕ، بێده‌نگى!

 
 

سامان ره‌سووڵ پوور

2010.08.24 - 20:10

 

له‌ فارسیه‌وه‌: محه‌مه‌د چاوشین
وێنه‌ى یه‌که‌م: له‌لایه‌ک ده‌وڵه‌تێک له‌سه‌ر کاره‌ که‌ له‌ناوزۆربه‌ى کۆمه‌ڵگه‌ پێگه‌یه‌کى ئه‌و تۆى نییه‌. سه‌رکوت و گوشار له‌هه‌موو ڕوویه‌که‌وه‌ درێژه‌ى هه‌یه‌، ده‌یان ڕۆژنامه‌نووس و سه‌دان هه‌ڵسوڕاوى سیاسى له‌ زینداندان. ده‌یان ڕۆژنامه‌و بڵاوکراوه‌ داخراون. ڕێکخراوه‌کانى مافى مرۆڤ و کۆمه‌ڵى مه‌ده‌نى هه‌ڵوه‌شێندراونه‌ته‌وه‌.  

 

 

ڕێبه‌رانى نه‌یار هه‌ڕه‌شه‌یان له‌سه‌ره‌و و ئازادى کارى سیاسیان نییه‌. ئافره‌تان له‌گه‌ڵ هه‌ڵوه‌شاندنه‌وه‌ى یاساکانى جیاوازى ڕه‌گه‌زى به‌ره‌و ڕوون، گه‌لانى ئێران داواى مافه‌کانیان ده‌که‌ن، مه‌زهه‌به‌ جۆربه‌جۆره‌کان گوشاریان له‌سه‌ره‌، زانکۆکان ئه‌منییه‌تى کراون و بوارێک بۆ چالاکى سیاسى و ته‌نانه‌ت پیشه‌یش نه‌ماوه‌ته‌وه‌، سه‌ره‌ڕاى ئه‌وانه‌ش، هه‌ژارى و بێکاریش له‌ناوکۆمه‌ڵگه‌دا به‌شێوه‌یه‌کى به‌رچاو بڵاو بۆته‌وه‌.

 

وینه‌ى دووه‌م: کۆمه‌ڵگه‌و وڵاتێک که‌ له‌ناوخۆیدا له‌گه‌ڵ ئه‌و کێشه‌و گرفتانه‌ ڕووبه‌ڕووبێ، له‌گه‌ڵ مه‌ترسیه‌کى گه‌وره‌ ڕووبه‌ڕوویه‌: مه‌ترسى شه‌ڕ. به‌ شێوه‌یه‌ک که‌: به‌رپرسى هێزه‌کانى ئه‌مریکا قسه‌ له‌سه‌ر ئاماده‌کردنى پڕۆژه‌یه‌ک بۆهێرش کردنه‌سه‌ر ئێران ده‌کات. سه‌رۆکى پێشوى ده‌زگاى هه‌واڵگرى ئه‌مریکا ده‌ڵێ: ئه‌گه‌رى هێرشى سه‌ربازى بۆسه‌ر ئێران له‌ئارادایه‌. به‌ده‌یان ئه‌ندامى کۆنگرێسى ئه‌مریکا پشتیوانى له‌بیرۆکه‌ى به‌کارهێنانى هێزى سه‌ربازى ئیسڕائیل له‌دژى ئێران ده‌که‌ن. گوشار و گه‌مارۆ نێوده‌وڵه‌تیه‌کان توندتر بوونه‌ته‌وه‌ ، به‌ شێوه‌یه‌کى گشتى ئێران ڕووبه‌ڕووى هه‌ڕه‌شه‌ و مه‌ترسیه‌کى زۆر بۆته‌وه‌ که‌ ئاینده‌یه‌کى شاراوه‌ و نادیارى بۆ ئه‌و وڵاته‌ به‌دواوه‌یه‌.

 

وێنه‌ى سێهه‌م: هه‌ڕه‌شه‌ سه‌ربازییه‌کان له‌دژى ئێران له‌ هه‌مووکاتێک زیاتر خۆیان ده‌نوێنن، به‌ڵام ڕاى گشتى له ‌هه‌موو کاتێک زیاتر بێده‌نگ تره‌. نه‌ له‌ کۆچه‌و کۆڵان، نه ‌له‌ناو قو‌تابخانه‌ و زانکۆکان، نه‌ له‌ پایته‌خت و شاره ‌گه‌وره‌کان، خه‌ڵکانێک که‌ بێگومان نیگه‌رانى شه‌ڕن په‌رچه‌کردارێک له‌ خۆیان نیشان ناده‌ن. وه‌ک نه‌ هه‌ڕه‌شه‌یک له‌گۆڕێدا بێ و نه‌ قسه‌یه‌ک له‌سه‌ر شه‌ڕ، له‌گه‌ڵ ئه‌وه‌دا که‌ زۆربه‌ى خه‌ڵکى ئێران خوازیارى شه‌ڕ نین. ته‌نها په‌رچه‌کردار و کاردانه‌وه‌یه‌ک که‌ بوونى هه‌بێ په‌یوه‌سته‌ به‌ فه‌رمانده‌ سه‌ربازییه‌کان. لایه‌نى بیروڕاى گشتى بێده‌نگه‌.

 

به‌ڵام له‌و نێوه‌دا پرسیارى سه‌ره‌کى ئه‌وه‌یه‌: هاووڵاتیانى ئێران بۆچى له‌به‌رامبه‌ر ئه‌و هه‌موو هه‌ڕه‌شه‌ و گوشارانه‌ بێده‌نگییان هه‌ڵبژاردووه‌؟ بۆچى ته‌نها ده‌نگێک که‌هه‌یه‌ ده‌نگى فه‌رمانده‌ سه‌ربازییه‌کانه‌ نه‌ک خه‌ڵکانى ترى ئێران؟

 

کاره‌ساته‌که‌ لێره‌دایه‌، کاتێک کۆمه‌ڵى مه‌ده‌نى سه‌رکوت ده‌کرێت، کاتێک ئاشتىخوازانه‌ترین ناڕه‌زایى خوێناوى ده‌کرێ، کاتێک ڕێز له‌ ئازادى ڕاده‌ربڕین وجیاوازى بیروڕا ناگیردرێت، کاتێک گرتوخانه‌کان پڕده‌بێ له‌ نوخبه‌کانى کۆمه‌ڵگه‌ و شه‌قامه‌کانیش خاڵى ده‌بن له‌ خسته‌ڕووى داخوازى و ده‌ربڕینى ده‌نگى ناڕه‌زایى، کاتێک هاواره‌کان بێده‌نگ ده‌بن، سروشتییه‌ که‌ ئیتر ده‌نگێک نامێنێته‌وه‌ بڵێ: شه‌ڕ نا!!، "نه‌دا"یه‌ک نامێنێته‌وه‌ که‌ زه‌مزه‌مه‌ى ئاشتى بکات. گردبوونه‌وه‌ ده‌وڵه‌تیه‌کانیش بایه‌خێکى ئه‌و تۆیان نییه‌ و کاریگه‌ریشیان بۆ هیچ شوێنیک بڕناکات.

 

ده‌رسێک که‌ ده‌بێ فێرى بین ئه‌وه‌یه‌: ئه‌گه‌ر له‌ناوخۆدا کۆمه‌ڵى مه‌ده‌نى گه‌شه‌نه‌کات، ئه‌گه‌ر ئازادى ڕاده‌ربڕین و بیروباوه‌ڕ و کۆڕو کۆبونه‌وه‌ بوونى نه‌بێ، ئه‌گه‌ر سه‌رکوت و پێشلکردنى مافه‌کانى مرۆڤ له‌گۆڕیدابێ، ئه‌گه‌ر زیندان و دورخستنه‌وه‌و ئه‌شکه‌نجه‌ هه‌بێ، خه‌ڵک ته‌نانه‌ت له‌به‌رامبه‌ر شه‌ڕیشدا بێده‌نگى هه‌ڵده‌بژێرن. بێده‌نگیش نه‌بن کاردانه‌وه‌کانیان هیچ کاریگه‌ریه‌کى نابێت و ئه‌مه‌ش یه‌کێکه‌ له‌ مه‌ترسیدارترین ئه‌و ده‌رهاویشتانه‌ى که‌ له‌ئه‌نجامى سه‌رکوتى ناوخۆیى که‌وتۆته‌وه‌.

 

گه‌شبینانه‌ترین لێکدانه‌وه‌ش لێره‌دا ئه‌وه‌یه‌ : ئه‌گه‌ر وڵات له ‌مه‌ترسیدابێ، هاووڵاتیان گرفت و کێشه‌کانیان له‌گه‌ڵ حکوومه‌ت وه‌لا ده‌نێن و له‌به‌رامبه‌ر هێرشبه‌ران ده‌وه‌ستنه‌وه‌. به‌ڵام کاتێک نه‌یاران و جودابیران دور ده‌خرێنه‌وه‌ و ده‌خرێنه‌ زیندان و له‌ناوماڵه‌کانیاندا ده‌ست به‌سه‌ر ده‌کرێن، ئه‌وه‌زیاتر له‌گاڵه‌ته‌و پێکه‌نین ده‌چێت.

 

پرسیارى کۆتایى: بۆچى حکوومه‌ت گرفته‌کانى خۆى له‌گه‌ڵ هاووڵاتیان هه‌ڵناپه‌سێرى و ده‌رگاداخراوه‌کان ناکاته‌وه‌، پێش ئه‌وه‌ى کاته‌که‌ زۆر دره‌نگ بێ؟

 

 

 

گه‌ڕانه‌وه بۆ لاپه‌ڕه‌ی یه‌که‌م          ئه‌م لینکه [2172] جار بینراوه            Send this page to your friens    Print this page    Send comment to this page

 
 
 

 

 

مانشێت

 
 

 

 
 

 

 
 

 

 

 

هه‌واڵ

 
 

 

 
 

 

 
 

 

 

 

ڕاپۆرت‌و ئانالیز

 
 

 

 
 

 

 
 

 

 

 

مقالات فارسی

 
 

 

 
 

 

 
 

 

 

 

اخبار فارسی

 
 

 

 
 

 

 
 

 

 

 
 
 

Copyright © 2017 Renaissance. All rights reserved.